PINKY

PINKY

Pinky, el cantar que forma parte del nuevu proyectu "HUMANES".

Elizabeth Jane Cochran, nació en Pensilvania’l 5 de mayu de 1864. De pequeña llamábenla “Pinky”, porque so madre vistíala cuasi siempres de color rosa.

Entamó a trabayar en 1885 nel periódicu Pittsburg Dispath dempués d’escribir una carta d’opinión (roblada col pseudónimu «solitaria güérfana» o «güerfanina», según les fontes) nel que discutía los argumentos d’una columna onde s’aseguraba que la única finalidá de les muyeres yera la reproducción y el cuidáu de los fíos. La brillantez de los sos argumentos y el so valir llamaron l’atención del direutor qu’asoleyó un anunciu pa da-y trabayu.

Nun queda claro si entamó a escribir artículos d’investigación daquella, pero sí qu’escribió de xardinería, moda y sociedá na sección femenina del periódicu, daqué qu’a ella nun-y prestaba. Roblaba los sos artículos col pseudónimu de Nellie Bly, nome de la protagonista d’un cantar de Stephen Foster (autor del renomáu cantar Oh!, Susanna).

En 1886 decidió dexar el trabayu y viaxar a Nueva York. Entró a trabayar nel diariu New York World de Joseph Pulitzer, convirtiéndose na precursora del periodismu secretu. Pal so primer artículu fízose la lloca ya ingresó nun asilu psiquiátricu pa muyeres, onde tuvo 10 díes. Col so trabayu denunció los abusos de l’alministración sobre les pacientes, primiendo a les autoridaes sanitaries p’abrir una investigación oficial. Dempués, fizo otros trabayos de denuncia social, colándose en fábriques, compañíes de balé, boxéu, circos d’elefantes, un fumaderu d’opiu... Dalguna biografía de so fai referencia a un estilu periodísticu sensacionalista y a una personalidá egocéntrica. Los sos biógrafos argumenten que de nun ser asina, nunca nun sedría quien a facese sitiu nel periodismu de la dómina.

Convirtióse nun fenómenu mediáticu mundial en 1889/1890, cuando-y propunxeron dar la vuelta al mundu, imitando les aventures de la novela de Julio Verne La vuelta al mundo en 80 días. Al so pasu per Francia tuvo una entrevista col autor. Acabó’l viaxe en 72 díes. La so aventura tuvo venceyada a una gran campaña publicitaria, hasta se vendió un xuegu de mesa. Toles sos biografíes falen de la maleta que llevaba nel viaxe, reseñando, sobre manera, que llevaba con ella un bote de crema pa la cara. Otra muyer, Elisabeth Bisland Wetmore, escritora y periodista de la dómina, de la revista Cosmopolitan, salió’l mesmu día que Nellie Bly cola mesma intención pero entamando’l viaxe a la escontra. Ella tardó 76 díes y ½ n’acabar el viaxe.

Bly abandonó’l periodismu dempués de casar en 1895 con Robert Livingston Seaman, un empresariu del sector del fierro y l’aceru que-y doblaba la edá. Bly entamó a implicase nos negocios del home y cuando esti finó en 1904 encargóse de les empreses. Na so xestión, inxertó delles meyores pa los trabayadores (horarios, salarios, zones de recréu y educación...), pero los negocios nun fueron bien económicamente (hai versiones que culpen del fracasu a fraudes fechos poles persones de la so confianza) y a la fin quebraron.

Dempués d’arruinada, volvió a dedicase al periodismu, entamando a escribir nel diariu Evening Journal de Nueva York. En 1913 cubrió la convención a favor del sufraxu femenín, viaxó a Europa pa facer de corresponsal na Primer Guerra Mundial... El so testu caberu foi asoleyáu 5 díes enantes de finar de neumonía en Nueva York, el 27 de xineru de 1922, a los 57 años d’edá

Hestoria: Marianela Colomer
Lletra y música: María Latores
Música: Marta Elola